Google internet-gigantining "Google Chrome” brauzeri birin-ketin veb-brauzerlarni ortda qoldirib, desktop kompyuterlar uchun eng ko‘p foydalaniladigan brauzerga aylanib borayotgan bo‘lsa, uning Android qurilmalar uchun oldindan o‘rnatilgan holda chiqadigan "Android Browser” ham yaqinda eng mashhur mobil brauzerlik maqomini "Opera”dan tortib olgan edi. Google keyinchalik "Google Chrome” brauzerining mobil versiyasini ham chiqardi.[ ?]

Kecha "Opera Software” kompaniyasi o‘zining mobil telefonlar uchun eng mashhur "Opera Mini” brauzerining navbatdagi 7-versiyasini chiqardi. Brauzerning yangi versiyasi "Opera Mini 7 Next” deb nomlanib, u HTML5 va 3D-grafikani qo‘llab-quvvatlaydi.

Asosan smartfon va planshet kompyuterlar uchun mo’ljallangan "Opera Mobile” brauzeri ham o‘zining 12-versiyasiga yetib keldi.

Opera o‘z brauzerini mobil telefonlar uchun moslashtirgan ilk kompaniyalardan sanaladi. Uning tez orada mashhur bo‘lib ketishiga sabab shuki, brauzer veb-sahifalarni yuklashdan oldin ularni o‘z serverida siqib (ba’zan 90% gacha siqiladi), keyin ochar edi.